Vajza e cila u bë e famshme falë spektaklit “Big Brother” po shijon ditët më të mira të jetës së saj. E cilësuar nga publiku si “dekor” i shtëpisë, pasi është vërtetë një bukuroshe, ajo reagon butë ndaj këtyre fjalëve. “Nuk kanë pasur rastin të më njohin nga afër pasi kanë shikuar vetëm bukurinë e jashtme”, thekson Mimoza. Për momentin po i ndihmon vëllait në biznesin e tij ndërkohë pritet të udhëtojë për në New York. Ëndërr e secilës vajzë është të shijojë suksesin, por ky rast nuk u jepet gjithëve. Për hyrjen në spektakël, qëndrimin brenda, planet në të ardhmen, për “Panorama plus”, rrëfehet ish-banorja nga Kosova, Mimoza Krasniqi.E ke menduar se një ditë do të bëhesh e famshme dhe të tjerët do merren me ty?Se kam menduar, por edhe pse ka ndodhur që u bëra e famshme nuk i kam lënë as edhe njëherë të tjerët të merren me mua se jam e zonja e vetes për gjithçka.
Përveç motrës dhe familjes, kush tjetër ju ka shtyrë të hyni në spektakël?
Fjala e familjes për mua vlen më shumë se çdo gjë, kështu që dëshira e tyre më shtyu që të bëhem pjesë e atij spektakli.
E keni ndjekur më herët spektaklin “Big Brother Albania “?
Po e kam ndjekur dhe më ka pëlqyer prandaj dhe shkova të provoja dhe unë atë eksperiencë.
Dhe, pas hyrjes brenda, çfarë të pëlqeu e çfarë jo?
Më ka pëlqyer gjithçka që ishte aty brenda gjë që e shijova me kënaqësi në çdo aspekt atë reality shou.
Gjatë qëndrimit brenda shtëpisë ke deklarura se je e dashuruar?
Nuk kam deklaruar ndonjëherë që kam qenë e dashuruar, kam thënë që kisha një lidhje jashtë të cilën nuk do ta quaja lidhje në fakt sepse ishte diçka që më shumë e bëm si një lloj projekti për ta bërë më interesante lojën.
Qëndrove gjatë brenda, publiku jashtë të ka komentuar në forma të ndryshme. Të kanë trasmetuar të afërmit gjithë ato shkrime që kanë qenë nëpër media?
Po qëndrova gjatë brenda në atë shtëpi, është shumë e drejtë që njerëzit të japin mendime të ndryshme për mua se më kanë parë 24 orë kështu që unë kam parë disa gjëra që më kanë transmetuar të afërmit e mi, kam qenë e kënaqur që më kanë vlerësuar dhe më kanë mbështetur të qëndroj aq gjatë në lojë.
Je një vajzë e re dhe e bukur, të tjerët të kanë përshkruar më shumë si një “dekor” brenda shtëpisë, çka do u thoje atyre?
Unë do u thoja atyre që nuk keni pasur rastin të më njihni nga afër, prandaj vetëm më keni komplimentuar për bukurinë time të jashtme por gjithsesi i falenderoj të gjithë ata që kanë pasur këto mendime për mua.
Po tani, çfarë është duke bërë Mimoza?
Jam duke bërë jetën time të zakonshme vetëm se tani po i ndihmoj vëllait tim në biznesin e tij.
Me studimet si shkojnë punët?
Këtë vit nuk kisha mundësi të filloja me studimet sepse isha e pa vendosur pasi kisha shumë plane të tjera, por gjithsesi vitin tjetër do të filloj studimet.
Si kalon një ditë e juaj?
Zgjohem në mëngjes, pi një kafe me motrat pastaj nisem për në punë te vëllai që ta ndihmoj. Në kohë të lirë vizitoj të afërmit e mi, pastaj kur gjej kohë futem ndonjëherë në internet që t’ju përgjigjem fansave të mi dhe zakonisht gjatë fundjavës bëj ndonjë plan për të dalë në mbrëmje me shoqëri për argëtim.
Pas daljes, të është ofruar ndonjë punë e mirë të cilën nuk ke mundur ta refuzosh?
Më janë ofruar disa oferta të ndryshme, të bukura të cilat shumë vajza i ëndërrojnë t’i kenë por kjo ofertë që më është ofruar kohët e fundit,  të cilën kursesi nuk do e rrefuzoj, ka të bëjë me modelizëm. Më kanë kërkuar në New York që të pozoj për katalogë dhe për shumë gjëra të tjera e kjo kërkesë më është bërë nga disa firma shumë të njohura të cilat së shpejti do i merrni vesh pasi do të bëhen realitet.
Ndërkohë në një intervistë për mediat kosovare, ke deklaruar se nuk je dhe nuk ke qenë e dashuruar asnjëherë?
Jo nuk kam qenë ndonjëherë e dashuruar por shpresoj që në të ardhmen të gjej  shpirtin tim binjak (qesh).
Si qëndron puna me banorët e tjerë. Shoqërohesh me ta apo vetëm kur të jepet mundësia?
Nuk kam aq mundësi t’i takoj banorët sepse jetoj në Kosovë, kështu që më shumë komunikoj me telefon, por kur më jepet mundësia të jem në Tiranëm i takoj patjetër.
Sikur të të jepej mundësia edhe njëherë do kishe marë pjesë në “Big Brother”?
Unë e shijova atë eksperiencë një herë, nuk do dëshiroja të provoja për herë të dytë se tashmë e di ndjenjën si është të jesh aty brenda.
Në Kosovë po organizohet një spektakël i ngjajshëm por me një emër tjetër. Ju kanë ftuar juve që të merrni pjesë në hapjen e këtij show?
Po e di që është duke u organizuar. Nuk kam pasur ndonjë ftesë por uroj që të ketë sukses ky reality show që do zhvillohet në Kosovë.

Një mis si misionare e ruajtjes së mjedisit

Suada Saliu do përfaqësojë Shqipërinë në “Miss Earth 2009”

Është një nga konkurset e përvitshme ndërkombëtare të bukurisë por ka një specifikë të veçantë. Vajza që do të zgjidhet “Miss Earth Word” do të jetë një misionare e vërtetë e tokës dhe do të angazhohet seriozisht në problemet mjedisore. Patentën për të dërguar përfaqësuesen nga Shqipëria e ka Alba-Media Entertainment, një kompani e regjistruar në Angli që në vitin 2002, e drejtuar nga Enkeleid Omi. Kësaj rradhe Miss Earth Albania është zgjedhur Suada Saliu, është 22 vjeç, ka lindur në Lezhë dhe jetën e saj e ka bërë mes Shqipërisë dhe Italisë. Në Angli ka shkuar vetëm për të konkuruar ku dhe ka fituar duke marrë votat maksimale nga një juri e zgjedhur për të votuar vajzat pjesëmarrëse në konkurim.
“Miss Earth Albania” zhvillohet në Angli, që nga viti 2005. Vjet kurorën e misit e mori Rudina Suti nga Gjirokastra.
Në intervistën e dhënë në faqen zyrtare të “Miss Earth”, e cila këtë viti do të zhvillohet në Filipine, e pyetur se cilat janë qëllimet e pjesëmarrjes tënde në këtë konkurs dhe çfarë angazhimesh i ke vënë vetes, Suada është përgjigjur kështu: “Unë dua t’i tregoj mbarë botës se sa e rëndësishme është ta mbajmë natyrën të gjallë, të ndalojmë ndotjen dhe ta ruajmë natyrën para se të jetë shumë vonë. Unë dua të bisedoj me qeveritarë dhe politikkanë që t’i bind ata që të punojnë me mua për të realizuar projektet në mbrojtje të tokës mëmë”

Blerand Rexhepi – Panorama PLUS